Saturday 16 March 2013

سخت افسردہ ہو گئے ہیں ہم


سخت افسردہ ہو گئے ہیں ہم
اے غمِ دوست ایک نگاہِ کرم

کون اٹھ کر گیا ہے محفل سے
بزم کی بزم ہو گئی برہم

عشق نے یوں کہا افسانۂ درد
حسن کی آنکھ بھی ہوئی پرنم

نہ جھکے گا یہ سر کسی در پر
مجھ کو تیرے ہی آستاں کی قسم

اپنی ناکام آرزوؤں کو
کس تمنّا سے دیکھتے ہیں ہم

کیسی کیسی خزاں سے گزرے ہیں
خوب گزرا بہار کا موسم

زندگی اور یہ غمِ پیہم!
زندگی ہے کہ زیست کا ماتم

کل ترستا تھا جس بہار کو دل
آج روئے ہیں اس بہار پہ ہم

(صوفی تبسّم)

No comments:

Post a Comment