نگاہِ ساقیِ نامہرباں

نگاہِ ساقیِ نامہرباں یہ کیا جانے

کہ ٹوٹ جاتے ہیں خود دل کے ساتھ پیمانے

ملی جب ان سے نظر بس رہا تھا ایک جہاں

ہٹی نگاہ تو چاروں طرف تھے ویرانے

حیات لغزشِ پیہم کا نام ہے ساقی

لبوں سے جام لگا بھی سکوں، خدا جانے

تبسموں نے نکھارا ہے کچھ تو ساقی کے

کچھ اہلِ غم کے سنوارے ہوئے ہیں میخانے

یہ آگ اور نہیں، دل کی آگ ہے ناداں

چراغ ہو کہ نہ ہو، جل بجھیں گے پروانے

فریبِ ساقیِ محفل، نہ پوچھیے مجروح

شراب ایک ہے، بدلے ہوئے ہیں پیمانے

(مجروح سلطانپوری)