خیالِ ترکِ تمنا نہ کر سکے تو بھی

خیالِ ترکِ تمنا نہ کر سکے تو بھی

اداسیوں کا مداوا نہ کر سکے تو بھی

کبھی وہ وقت بھی آئے کہ کوئی لمحہ عیش

مرے بغیر گوارا نہ کر سکے تو بھی

خدا وہ دن نہ دکھائے تجھے کہ میری طرح

مری وفا پہ بھروسا نہ کر سکے تو بھی

میں اپنا عقدہء دل تجھ کو سونپ دیتا ہوں

بڑا مزہ ہو اگر وا نہ کر سکے تو بھی

تجھے یہ غم کہ مری زندگی کا کیا ہوگا

مجھے یہ ضد کہ مداوہ نہ کر سکے تو بھی

نہ کر خیالِ تلافی کہ میرا زخمِ وفا 

وہ زخم ہے جسے اچھا نہ کر سکے تو بھی