Sunday 31 March 2013

لگانا دل کسی نامہرباں سے


لگانا دل کسی نامہرباں سے
زمیں کی دوستی ہے آسماں سے

نظر آتے تھے تم تو بے زباں سے
یہ باتیں آ گئیں تم کو کہاں سے

نظر آتے ہیں وہ کچھ مہرباں سے
گرے گی کوئی بجلی آسماں سے

یہ ننگِ عجز ہے اک بار رکھ کر
اٹھانا سر کسی کے آستاں سے

وصالِ جاودانی چاہتا ہوں
مگر وہ زندگی لاؤں کہاں سے

سنا دوں داستانِ غم سنا دوں
اگر تُو سن سکے میری زباں سے

اُنہیں باتوں سے جو بیتاب کر دے
الٰہی وہ زباں لاؤں کہاں سے

کریں کیا ان سے اظہارِ محبت
وہ سن لیں گے ہمارے رازداں سے

(صوفی تبسّم)

No comments:

Post a Comment