Sunday 3 March 2013



سرِ طاقِ جاں نہ چراغ ہے ، پسِ بامِ شب نہ سحر کوئی !
 عجب ایک عرصہِ درد ہے ، نہ گمان ہے نہ خبر کوئی !

 نہیں اب تو کوئی ملال بھی ، کسی واپسی کا خیال بھی ...
 غمِ بے کسی نے مٹادیا مرے دل میں تھا بھی اگر کوئی !

 تجھے کیا خبر ہے کہ رات بھر تجھے دیکھ پانے کو اِک نظر ...
 رہا ساتھ چاند کے منتظر تری کھڑکیوں سے اُدھر کوئی !

 سرِ شاخِ جاں ترے نام کا عجب ایک تازہ گلاب تھا ...
 جسے آندھیوں سے خطر نہ تھا جسے تھا خزاں کا نہ ڈر کوئی !

 تری بے رُخی کے دیار میں، گھنی تیرگی کے حصار میں ...
 جلے کس طرح سے چراغِ جاں , کرے کس طرف کو سفر کوئی !

 کٹے وقت چاہے عذاب میں، کِسی خواب میں یا سراب میں ....
 جو نظر سے دُور نکل گیا ، اُسے یاد کرتا ہے ہر کوئی !

 سرِ بزم جتنے چراغ تھے وہ تمام رمز شناس تھے ...
 تری چشمِ خوش کے لحاظ سے نہیں بولتا تھا مگر کوئی !!

No comments:

Post a Comment