وہ خدا ہیں کہ نہیں ہیں
اس بزم میں آخر شعرا ہیں کہ نہیں ہیں
انداز مِرے سب سے جُدا ہیں کہ نہیں ہیں

زاہد سے نہیں حُسن کی سرکار سے پُوچھو
ہم بندۂ تسلیم و رضا ہیں کہ نہیں ہیں

جلووں کی طلب، پیروی حضرتِ مُوسیٰ
گُمراہ مِرے راہنما ہیں کہ نہیں ہیں

آ تجھ کو دِکھا دُوں کہ ستاروں سے بھی آگے
انسان کے نقشِ کفِ پا ہیں کہ نہیں ہیں

ہاں میں تو لئے پھرتا ہوں اِک سجدۂ بیتاب
ان سے بھی تو پوچھو وہ خدا ہیں کہ نہیں ہیں

کلام: حفیظ جالندھری ۔ 1923ء