تھا وہ اِک عجب سِتارہ
کِسی اور کہکشاں کا
کِسی اور کہکشاں میں
کہ ہو جیسے کوئی منظر
کِسی اور داستاں کا
کِسی اور داستاں میں!

اُسے میں نے جب بھی دیکھا
کِسی اور دُھن میں پایا
وہ تلاش کر رہا تھا
راہِ وادیٔ سُخن میں
کِسی رَوشنی کی جھِلمِل
کِسی واہمے کا سایہ!

وہ تھا اِک عجب سِتارہ
سرِ آسمان تنہا
کبھی ڈھُونڈتا تھا خُود کو
کبھی وقت کا کِنارہ
وہ تھا شاعری میں زِندہ
اُسے زِندگی نے مارا
تھی تلاش جِس کی اُس کو
اُسی آگہی نے مارا......