اہلِ دوَل میں دھوم تھی روزِ سعید کی
مفلس کے دل میں تھی نہ کرن بھی امید کی
اتنے میں اور چرخ نے مٹی پلید کی
بچے نے مسکرا کے خبر دی جو عید کی
فرطِ محن سے نبض کی رفتار رک گئی
ماں باپ کی نگاہ اٹھی، اور جھک گئی
آنکھیں جھکیں کہ دستِ تہی پر نظر گئی
بچے کے ولولوں کی دلوں تک خبر گئی
زلفِ ثبات، غم کی ہوا سے بکھر گئی
برچھی سی ایک، دل سے جگر تک اتر گئی
دونوں، ہجومِ غم سے ہم آغوش ہو گئے
اک دوسرے کو دیکھ کے خاموش ہو گئے
(جوش ملیح آبادی)
No comments:
Post a Comment