میری تنہائی میں مجھ سے گفتگو کرتا ہے کون
تُو نہیں ہوتا تو میری جستجو کرتا ہے کون
کس کا خنجر ہے جو کر دیتا ہے سینے کو دو نیم
پھر پشیمانی میں زخمِ دل رفو کرتا ہے کون
اِس خرابے میں بگولہ سی پھر ے ہے کس کی یاد
اِس دیارِ رفتگاں میں ہاؤ ہو کرتا ہے کون
خوف کس کا ہے کہ اپنے آپ سے چھپتا پھروں
نا گہاں پھر مجھ کو میرے رو برو کرتا ہے کون
کونسا موسم چُرا لیتا ہے غنچوں کی چٹک
نغمہ پیراؤں کو سُرمہ در گُلو کرتا ہے کون
کون پی جاتا ہے آخر مرے حصے کی شراب
میں نہیں ہوتا تو پھر خالی سبو کرتا ہے کون
(احمد فراز)
(اے عشق جنوں پیشہ)
No comments:
Post a Comment